投資者日記 [曹仁超] 2008 08 29 藝人點解難剩錢？ 8月28日，周四。恒生指數跌492.43，收20972.29；成交667.2億元。8月期指跌280點，收21131點，由於結算日在即所以唔可以作準；9月期指跌423點，收20940點，仍較現貨指數略低。 中移動（941）跌6.3％，因摩通降該公司評級；聯通（762）跌7.3％；思捷環球（330）跌18％，係近十年內最大跌幅，最少三間證券行同時降該公司評級；中石油（857）因煉油事業虧損，股價跌3.3％；內地銀監會再次收緊房貸，令北辰實業（588）跌4.57％，報1.67元；上海復地（2337）跌7.18％，收1.55元；華潤置地（1109）跌3.2％，收8.9元。 日本地產都唔掂 《上海證券報》報道，土地係房地產源頭，2006及07年上海公開招拍掛批出嘅大批土地，唔少至今仲未投入市場。部分理由係開發商無法借到資金去開發土地，只有將D土地閒置。呢次中國人民銀行及銀監會共同發布嘅通知，令商業銀行唔可以發放貸款，對好多中小型開發商嚟講係「不可承受嘅重」。原來被視為香餑餑嘅土地，忽然間變成燙手山芋，最後結果可能係賤價拋售。 英國8月份平均樓價較去年同期跌10.5％，係近二十年內最大跌幅（較7月份跌1.9％），亦係1990年以嚟首次出現雙位數字下跌。喺倫敦嘅德銀分析員George Buckley估計全年跌幅可達15％，再加埋英鎊由去年11月兌2.1162美元，回落到家吓1.8377美元，跌幅達7％，即係除咗樓價下跌外仲要加埋滙率損失，所以都幾傷。法國第三大銀行Credit Agricole 今年第二季純利較去年同期跌94％，今年第一季次按撥備達55億歐羅，5月份主管換人，第二季進一步撥備；今年內股價已下跌34％。7月15日起美元滙價回升嘅理由唔係美國情況好轉，而係歐洲同英國情況惡化，令投資者覺得揸美金反而安全D。 滬深三百指數今天上升0.45％，收2335.86。美邦服飾首日上市仍升36.13％，見到喺內地申請發行新股仲係穩賺唔蝕嘅行為。 Daiwa House Industry Co.（日本第二大地產建築商）主席Takeo Higuchi估計，未來有更多日本地產公司破產，Topix Property Index過去十二個月已跌咗38％，係三十三個行業中表現最差嗰行，同期Topix只回落17％。 菲律賓第二季GDP只上升4.6％，今天宣布加息0.25厘，至6厘，因7月份通脹率達12.2％。 技術表現睇7月15日至家吓係「熊徘徊」區，而唔係「牛收集」期。 去年10月起因抵押品跌價而引發嘅次按危機，令現金日漸變得稀少，Dow Theory Letter作者李察羅素（我老曹嘅道氏理論，亦係由佢嘅每月通訊中學習）警告，世界上大部分地區正步入通縮期，而唔係通脹期。巴西批發物價指數7月份出現負0.44％（6月仍升2.28％）。喺倫敦Lombard Street Research嘅Gabriel Stein指出，美國7月份MZM減少500億美元，係1959年以嚟最大跌幅（雖然一個月唔代表趨勢，但三個月平均升幅只得2.1％、六個月6.3％及十二個月11.5％），理由係房價下跌緊。 颶風古斯塔夫好似吹向墨西哥灣，油公司已開始疏散油井上嘅工作人員，上述因素令油價止跌回升，估計影響只係暫時，颶風過後相信油價又再回落。 現金又成皇帝 玉米自6月27日見每蒲式耳7.9925美元後，至今跌咗26％；大豆7月3日見16.3675美元後，至今跌咗18％；小麥由3月12日13.4925美元後，至今跌幅37％，再次證明農產品受天氣影響大過一切。 摩通環球天然資源基金嘅Ian Henderson同意，長遠嚟講商品價格仲可以睇好，但去年8月次按危機後，礦業股平均跌幅20％，令呢類公司好難集資；加上鎳、鋅及白金等價格已較最高峰回落50％以上，令唔少投資者出現財政困難，被迫套現。甚至環球天然資源基金亦由今年2月至今跌咗30％。金屬價格可唔可以喺家吓嘅水平穩定落嚟，唔再進一步下跌？就算係咁，下半年礦業股利潤已大減，唔少投資者等唔到下一個上升浪矣。 今年11月美國大選，大選後如通脹率仲未大幅回落，12月份美元加息機會好大。如12月唔加息，明年第一季亦需加息，因為長遠而言利率必需維持喺CPI升幅2厘或以上，除非通脹率跌到零，先可以阻止今年12月或明年第一季聯儲局加息。上述加息行動可扼殺任何經濟開始復甦時嘅萌芽，情況好似九十年代嘅日本銀行。 隨住更多銀行被接管，美國FDIC手上嗰452億美元基金已唔夠應付，需向財政部借錢去支持接管銀行；上述又係另一令利率上升嘅因素。 過去七年對沖基金大量拋空美元去買股票、物業、商品及藝術品，今年7月引發美元大平倉至家吓已回升7％。Cash becomes King again（現金由7月份起，又再次成為皇帝），美元情況係咁，歐羅又點？代表十五個國家及三億五千萬人口嘅歐羅區，踏入今年亦減少發債，令歐羅供應上升速度下降；至於世界第五大經濟體系英國N，今年6月止仲喺度高速上升，但恐怕亦快見頂矣。因俄羅斯嘅有錢人正離開倫敦，例如Viktor Vekselberg、Mikhail Fridman及Leonard Blavatnik等，佢地每人揸住400億美元以上。根據《福布斯》資料，1998至2004年由俄羅斯流向倫敦房地產市場嘅資金超過1000億美元，超過三十萬俄羅斯人喺倫敦置業，係倫敦樓價暴升部分理由，至今超過一百間俄羅斯公司嘅倫敦交易所上市，佢地選擇倫敦理由係因為接近莫斯科及國際化，今年開始俄羅斯人從倫敦搬走。 A股散戶血流成河 今年第二季全球售出三億零四百七十萬部手提電話，較去年同期升12％（主要嚟自新興市場），相較去年第二季升幅21％，增長率已大幅放緩。估計今年全年升幅11％，至十二億八千萬部（去年升幅16％），升幅主要嚟自印度、中東及非洲，明年進入單位數升幅，流動電訊嘅高潮漸過去。 隨住OECD國家嘅GDP增長率放緩甚至負增長，對中國產品需求自然放緩，令中國出口業進入低增長期。今年1至7月中國外貿盈餘減少9.6％，上述因素引發去年10月至今滬深三百指數大幅回落，而且跌幅相當大。不過，中國經濟唔係英國、歐洲及美國，上述國家係成熟型經濟，GDP增長率好容易消失；反之，中國仍係新興國家，GDP增長只會下降到8％至9％之間，而唔係負增長，因政府以驚人速度投資基建項目。上述資金嚟自外滙儲備，所以唔使擔心因出口增長放緩，最終中國股市必出現V形反彈，問題係呢次急降幾時完成？參考1973／74年恒指喺二十二個月內回落91.5％；反之，內地人行一早已將利率上調、收緊存款保證金率及畀人民幣升值等，減低滬深A股升幅。令去年10月起下調幅度一定唔及1973／74年嘅恒指，至於時間要幾耐，往往事後先知，至今為止下調日子只得十個月，理論上仲未夠。1974年石油危機打擊肯定較呢次大（因為係第一次），加上恒生指數由1973年3月接近一百倍P/E回落到1974年12月六倍P/E。反觀去年10月滬深A股P/E不足五十倍便回落，至於到底要跌至幾多倍P/E先見底？亦要事後才知。不過，可以肯定滬深A股已漸進入冬季，能夠捱過冬季者，便可迎接春天嘅嚟臨。到時春回大地，一切又改觀。 去年10月至今跌幅十大A股，依次係雲南銅業（88.3％）、澳洋科技（87.1％）、石油濟柴（87.1％）、中色股份（86.9％）、ST金泰（86.4％）、株治集團（86.2％）、西部礦業（86.1％）、ST中鎢（85.9％）、鋅業股份（85.56％）、ST東盛（85.53％）。A股散戶喺過去十個月內，已血流成河，幾時先止血（有人認為流血不止、麻煩開始，內地股市係咪進入麻煩開始期）？ 力不到不為財 中國平安保險（2318）總裁馬明哲年薪超過6000萬元，反而中國人壽（2628）總裁楊超只有199萬元；研究兩間公司最近業績公布，冇證據證明高層人士高薪，可令公司業績表現出色。 大部分藝人缺點係「賺錢容易、剩錢難」。唔少成名藝人過身之時，家財都唔豐厚，理由係不善理財。例如屋企有幾百件服飾、幾十個手袋，隨住季節與流行要汰舊換新，未夠一年全部換晒。其次係自己冇時間，卻學人地做生意，忘記咗力不到不為財嘅道理。除非係大企業一切上晒軌道，一般小生意要做老闆者，分分鐘都要睇實。結果係蝕本者多賺錢者少；如再加上喺唔適當嘅時刻買樓或投資股票，便又多一位賺錢容易剩錢難嘅藝人。1987年10月股災後，明星麥嘉曾搵我老曹問：「點解佢喺期指市場蝕得咁大？」其實道理好簡單，因為做明星唔可以二十四小時都睇住個市，往往喺最唔適當入市時入市，咁就真係dido。何況二十年後今天，金融市場已變成鬥獸場，有錢冇時間嘅藝人請唔好入市。仲有一點要記住，係曉教書者唔代表曉經營學校、曉着衫唔代表識做時裝生意、曉食嘢唔代表可以做飲食業、曉寫文章者唔代表可以開報館，以及曉做戲者唔代表可以投資拍戲。 作為投資者應同政治保持一定距離，除非政治對經濟造成重大影響，我老曹先會評論， 例 如 1 9 8 2 年 中 國 收 番 香 港 主 權 、 1 9 8 4 年 中 英 聯 合聲 明 、 1 9 8 9 年 六 四 事 件 、1 9 9 7 年 7月 1 日 八 萬 五及 2 0 0 3年 7 月 嘅 二 十三 條 。 作 為 投 資者 ， 最 驚聽 到 政 治人物用應該呢個字，即英文Should！除咗上帝十誡外，其他都唔係應該，以免犯上好心做壞事。例如為全民提供住宅、提供大學教育及提供優質醫療服務等，往往造成市民對政府有過高嘅期望，最後卻係極大嘅失望。 過去指出大學教授最唔適宜做聯儲局主席。呢次令人擔心嘅事係牧師身份競選美國總統；加上本周三奧巴馬宣布拜登做佢助手，上述決定令希拉莉感到好冇癮，有人甚至認為民主黨可能因此分裂。拜登嚟自特拉華州，1973年起已做參議員，依家主管美國外交關係委員會；佢亦曾支持殊仔出兵伊拉克。由一個今年六十五歲議員去做一個四十七歲未來總統嘅副手，上述配搭係咪有D搞笑？由過去表現睇，拜登幾自滿，經常認為自己高人一等，例如吹噓自己係Syracuse College of Law嘅高才生，事實佢只係全班八十五人中考第七十六，1988年曾競選總統失敗，今年欲東山復出只因選票唔足而喺初選中退出。佢主張把伊拉克一分為三（類似過去將韓國及越南一分為二。由佢地自己打自己，唔使威脅他人）。1979年亦曾支持卡達嘅伊朗政策，令伊朗皇朝倒台由家吓嘅政權取代，伊朗成為美國嘅敵人。拜登對奧巴馬嘅吸引力係支持打工仔階級，呢點同奧巴馬理念相同。將來如由佢主管美國外交，相信美國將重返卡達時代（被人當佢冇到）。假設未來美國總統係奧巴馬同拜登雙結合，睇怕美國唔單止係經濟上走下坡，喺外交方面亦走姑息路線，正好配合2000年起美國開始走下坡嘅大趨勢，或者呢個係國運，實在無可奈何。
曹 仁 超 (30/08/2008): 美國經濟停滯 8月29日，周五。恒生指數升289.6，收21261.89；成交634.4億元。9月期指升320點，收21260點。中國銀行（3988）升 2.1％，收3.39元，因半年盈利升43％，見422億元人民幣；中銀香港（2388）跌3.3％，見17.5元；新世界（017）升5.5％，見12 元；信置（083）升6％，見13.82元；恒地（012）升2.3％，見47.5元；裕元（551）升4.1％，見21.75元；中海油田（2883） 升5.9％，見10.5元；中電（002）跌3.6％，見63.5元；數碼通（315）跌2.9％，見7.28元，因里昂降該公司評級。 恒指反彈力恐好弱 滬深三百指數升2.39％，收2391.64。太鋼不銹升4.7％，報7.8元；晨鳴紙業升3.3％，報9.05元，因上半年利潤升一倍；寶鋼升4％，收6.52元。 交銀施羅德基金管理公司基金經紀認為，家吓大舉買入A股可能仲係早，經過今年下挫後，日後嘅下跌空間已有限。 熊市二期有好多隻腳，今年3月18日恒指20572點應係熊市二期第一隻腳，如無意外今年8月21日恒指20350點係熊市二期中第二隻腳。一旦腳出現，便有反彈，例如3月18日起到5月5日26387點係熊市二期中最大一次反彈。至於8月21日起嘅反彈，擔心力量好弱。 花旗推介中信泰富（267），估計今年每股獲利2.65元，升16.9％，P/E十點二倍，目標價40元；SOHO中國（410）估計今年每股獲利 26.3仙，減少45.3％，P/E十三點二倍，目標價5.49元；中國鐵建（1186）估計今年每股獲利36.9仙，升95％，P/E二十六點三倍，目 標價14.2元；達芙妮（210）估計今年每股獲利31仙，升31.2％，P/E十二點四倍，目標價6.3元；新濠國際（200）估計明年恢復獲利每股 73仙，P/E六點二倍，目標價6元；民安控股（1389）估計今年每股獲利3仙，減少89.5％，P/E三十七點九倍，目標價2.27元；中化化肥 （297）估計今年每股獲利35仙，升62.9％，P/E十一點一倍，目標價7.6元。 澳洲Centro 2007／08年6月蝕咗21億澳元，為投資美國商場減值；Allco Finance蝕咗16億澳元及裁減半數員工。兩者今年股價跌幅超過90％及宣布換CEO。Centro喺美國、澳洲及紐西蘭擁有超過七百五十個商場，家 吓Centro市值只得1.65億澳元（去年5月係85億澳元），呢間公司喺美國有六百六十五個商場，一年前估值係139億美元，今年得128億美元，收 租股如借貸比率太高亦好危險。澳元8月出現二十二年內最大跌幅，見86.42美仙，較7月16日回落12％，係1986年7月以嚟最大跌幅。 南韓收支赤字7月達24.5億美元，見六個月內新高，南韓圜收1087兌1美元，央行估計今年全年收支赤字達90億美元。 投資對象難搵 英國樓價連跌十個月，8月下跌1.9％或較去年同期下跌10.5％，如以去年10月最高價計，下跌11.5％。九十年代初期，英國樓價曾下跌20％（實際 跌幅40％）；估計喺2010年前英國樓價下跌35％（實際跌幅41％，因近期通脹率唔高）。英國豪宅較去年8月回落1.6％，係連續第四個月下跌，呢次 豪宅（市值1000萬英鎊或以上）下跌係1990年以嚟首次，主因係三十多萬從事金融服務業嘅高薪人士今年不但花紅收入大減，同時佢地嘅職位亦可能不保。 周二美國FDIC公布，6月被接管嘅Indy Mac可能需注資89億美元，而唔係事前估計嘅40億元。依家美國有問題嘅銀行共一百一十七間，超過九十天未還貸款增加咗267億美元，較第一季升 19.6％，係1993年以嚟首次有問題貸款佔總貸款2.04％。FDIC手上嗰452億美元資金已唔足夠應付未來嘅需要。 過去二十四小時美國種植區落咗一吋高嘅雨，令玉米價格由6月27日7.9925美元下跌26％；大豆由6月3日16.3675美元下跌19％。估計今年全球產量減少6％（較事前估計略多）。 衰退係繁榮後嘅Counterbalance，即經濟愈繁榮接住而嚟嘅衰退愈長愈深；美國呢次信貸擴張期由1982年開始，到去年先結束，長達二十五年， 令呢次衰退期更長更深。金融係經濟脊骨，九十年代起嘅日本衰退點解會咁深及長？就係因為傷咗脊骨。呢次美國情況就類似係咁，估計唔係滯脹而係停滯；去年9 月至今年4月聯儲局已好重手，利用低利率及低美元去阻止經濟下滑，依家聯儲局手上已冇晒殺手鐧。滯脹係一方面停滯不前，另一方面係通脹；即係仲有投資項 目。 如果只係停滯不前，就好難搵投資對象，恐怕由今年7月起，美國經濟進入停滯不前期而唔係滯脹。 股市唔會年年有錢賺 去年應防危機，今年要小心謹慎。活着就係硬道理。1974年死唔去先可以活着享受1975年開始嘅繁榮；1982年死唔去先可以享受1984年開始嘅復甦；2003年4月前死唔去先可以……。作為投資者，今年活着就係硬道理，只有大難不死，才有後福。 後生一代可能唔知Bernie Cornfeld係邊個？佢由一位紐約市布魯克林區送貨員做起，其後成立IOS基金（Investors Overseas Services），並以保證回報去sell基金，然後將資金投資喺歐洲股票。初期都好成功（因股價升幅大過佢嘅保證回報）。隨住1967年起股市回 落，1968年開始出問題，1970年另一壞蛋Robert Vesco出手挽救IOS，並將IOS所揸嘅歐洲股份出售，集資5億美元後購入佢自己嘅投資。1971年IOS宣布破產，Cornfeld因此喺瑞士入 獄，反而Robert Vesco卻返番美國，揸住2億美元資金過住多姿多彩嘅生活，到去年先過身。 Cornfeld自己唔係存心呃D投資者，只係佢唔知股市冇可能只升唔跌而向IOS基金持有人作保證。佢以為一定可以喺股市中賺番合理回報，點知熊市嚟 到，能夠唔蝕錢已好本事；由於無法支持IOS基金持有人嘅股息而請咗Robert Vesco入局，但後者卻存心呃IOS基金持有人，將自己嘅失敗投資高價注入IOS後再拎走現金，但喺法律上佢反而冇犯罪。IOS事件話畀我地知，喺股市 中唔可能年年賺錢；同時小心D高層偷龍轉鳳，將唔好嘅投資高價注入，搞到股東當災而當事人逍遙法外。 Ibbotson Associates研究得出，每二十年標普五百指數便有一次或以上下跌兩年及跌幅達35％或以上。例如1973／74年跌幅係37.25％；2000至 02年更達41.65％，去年10月開始嘅回落係咪另一次下跌兩年及跌幅35％或以上嘅日子（以港股計已達上述幅度）？ 香港窮人點算窮？ 印度今年第二季GDP升幅只得7.9%（第一季8.8%），但通脹率卻達12.4%，6月至家吓央行已加咗息三次，印度股市今年已跌咗三分一，十年期債券息率8.66%，世界銀行估計今年印度GDP可升7%。 去年4月世界銀行估計全球極之貧窮人口高達九億八千六百萬，今年8月26日公布數字已經接近十四億，主要係過去一年糧食價及燃料費上升，令更多人跌落貧窮 線。其中二億七百七十萬係中國人、四億五千五百萬係印度人、三億八千四百萬係非洲人及一億三千萬係東南亞及太平洋地區嘅人，其餘嘅就分布世界各地。中國同 印度仲有大量極之貧窮人口每天生活開支少過十港元，佔總人口15%；印度更佔40%。其他好似印尼、柬甫寨、越南及孟加拉等都有大量貧窮人口。 同佢地比，香港窮人唔算窮。 <<轉載自信報>>
曹 仁 超 (01/09/2008): 奧巴馬是禍是福 8月31日，周日。受古斯塔夫颶風可能升級為五級颶風影響，美國新奧爾良約一百萬居民被強制疏散，本周一颶風將喺得克薩斯州東北及密西西比州西部之間登陸。古斯塔夫可能係美國史上威力最大嘅颶風，對墨西哥灣石油設施造成幾大破壞？事前無法預計。 中國四川南部攀枝花及涼山交界地震達六點一級，災民四十四萬、房屋倒塌十三萬間，其中學校佔六百五十六間，情況亦幾令人惆悵。 保本愈嚟愈難 上周房利美及房貸美因成功賣出40億美元短期債券，令佢地嘅股價急升。家吓兩房已換咗管理層，如政府肯支持佢地嘅優先股（有15厘息）自然好吸引，結果引發上周美股急升，可惜周五已晚節不保。 1987至97年係貪心嘅十年。只要你貪心便可發達；例如本港樓價由每呎2000元升到12000元，升幅500％；恒指由1987年12月1894點升到1997年8月16820點，升幅788％；真係幾貪都得，最終令港人貪得無厭。 1997至2007年可以話係冇回報嘅十年。恒生指數要到2006年8月先升穿1997年8月嘅高位（16820點）。如將去年8月至10月呢三個月升幅 剔除，即由恒指低於20000點升上31958點，然後又跌到上周五21261點呢段日子唔計，近十年內恒指升幅其實好有限（而且升幅集中喺國企股身 上）。本港一般樓價由1997年每呎12000元跌至2003年3600元，然後升到近日嘅7200元，除極少數（例如20％人口）財富喺過去十年仍上升 外，大多數人（佔香港人口80％）手上財富反而唔及1997年第三季。 未來十年又點？恐怕由去年10月起，本港已進入持盈保泰期。除拋空者或投資黃金及石油期貨者外，連股聖畢非德嘅投資由去年10月至今亦減值20％。如閣下 由去年10月至今唔使蝕本，你真係威過股聖。我老曹認為去年10月開始本港已進入小心謹慎期。保本變成愈嚟愈困難嘅事，更加唔好妄想增值。甚至CRB商品 指數今年7月初見頂至今已回落20％。 Hester Capital Management主席Craig Hester接受彭博訪問，預言明年上半年美國經濟增幅好小或冇增長，雖然今年第二季GDP上升3.3％。 房貸、信用卡貸款及汽車貸款都喺度惡化。紐約大學教授Edward Altman認為企業貸款亦開始惡化。末日博士麥嘉華更認為去年信貸泡沫爆破威力勁過1981／82年；1980年美國負債只係GDP 130％，去年已達350％，其影響將以年為單位。 歐羅今年4月兌1.6美元至今已回落5.8％，係歐羅滙價最差嘅8月。因IG Metal（歐盟最大工會）要求加人工7%至8％，分析家估計未來四季歐羅區GDP升幅只得1.25％；加上俄羅斯出兵格魯吉亞，以及美國計劃喺波蘭部署愛國者導彈令歐盟前景唔明朗。 加元去年升17％，但過去三星期跌幅相當快，喺8月12日見1.072加元兌1美元，上周五收市係1.0633加元兌1美元，估計明年見1.1加元兌1美元，即再跌10％左右。 8月份印度CPI升幅達12.4％、利率高達9厘、第二季GDP只上升7.9％（第一季8.8％）。印度經濟亦迅速放緩緊。 好多人唔滿意 根據Bill Bishop資料，1977至79年美國四百三十五個國會議員中，40％係溫和派；2003至05年已急速下降至10％。根據賓州大學政治科學Diana Mutz調查，有23％美國人對政治好不滿，最不滿嘅階級係教育程度中學或以下，最少不滿係博士。即美國中下層社會對依家嘅政治狀況好不滿，呢個就係點解 奧巴馬提出改變後，受到咁熱烈反應嘅理由。可以話2000年至今美國中產及下層社會對依家嘅社會狀況極之不滿，相信呢個同經濟表現有關。美國人口統計局公 布，美國中產家庭年收入由2000至07年從58500美元下降到56000美元。呢個係美國戰後首次經濟循環周期完畢時（2000年係科網股高潮、去年 係道指另一高潮），美國中產家庭收入唔及上一次！過去八年美國中產家庭收入喺度下跌緊，財富向1％人口集中；去年美國1％人口收入係近八十年內最高（只有 1929較2007年高）。美國GDP過去八年仍按3％年度速度上升，但去年美國中產家庭收入反而唔及2000年，唔怪之得大部分人希望改變。 香港雖然冇類似數字，但我老曹覺得去年香港中產家庭收入普遍唔及1997年！過去十年香港中產窮咗；但香港1％人口卻更富有（呢個係今年豪宅售價能超過1997年嘅理由）。 美國7月份CPI上升5.6％，係十七年內最大嘅升幅，相信同政府6月份退稅有關。7月寄出支票較6月少一半，相信8月份CPI升幅將少過7月份，唔排除 CPI升幅喺7月見頂。Hyun Song Shin係普林斯頓大學經濟系教授，佢認為美國金融危機正進入第二階段（第一階段係撥備5000幾億美元時）。第二階段將公布信貸蝕咗1萬億美元，開始影 響日常經濟。未來十二個月美國GDP增長率將受呢D因素影響。 美國物業市場由2006年第三季至家吓唔見咗17000億美元市值；加上油價由7月至今已回落25％、金價今年3月至今亦回落20％，大部分商品價格亦喺度回落緊，通縮壓力正逐漸浮現。 Business Week分析員James Cooper認為，美國物業情況令金融市場受損傷，搞到美國經濟長時期好唔起嚟，因為由房地產過度興建到消化完成所需時間好長。去年9月至今年4月透過減 息一度令美國樓市前景轉好，但今年3月出現貝爾斯登事件，之後係房利美及房貸美事件，令一度曾穩定落嚟嘅美國樓價又再下跌。今年6月至今按揭利率上升半厘 又再打擊買樓人士嘅信心；7月份未賣出嘅房屋相等於十點一個月嘅需求（五個月先係正常）。6月份標普Case Shiller房屋指數較一年前跌咗15.9％。其中拉斯維加斯、邁亞密及鳳凰城跌幅近30％，表現較好有沙羅特、達拉斯及丹佛。 OECD曾研究稅與經濟增長（Taxes and Economic Growth），證明稅率愈高，愈不利經濟增長。過去十八個月三十個OECD國家中有九個減稅，全球三十個國家減稅。八十年代英國同美國經濟開始復甦部分 理由亦係減稅。今年參議員Dorgan主張向油公司抽重稅不幸畀奧巴馬支持，並計劃擴展到美國企業海外收益上（美國企業海外收益只要唔滙返美國，係唔使畀 美國稅，令美國企業可將海外利潤再投資。如滙返美國就要抽39.03％稅。未來唔理係咪滙返去一律要抽39.03％稅。擔心美國企業將減少海外投資，將資 金調返美國）。7月15日起美元滙價回升係咪美國企業開始擔心奧巴馬當選；向大企業加重稅務負擔短期有利（例如資金回流、美元滙價上升），長期不利（因未 來企業純利升幅下降）。 1980年列根上台為美國經濟帶來重大改變；引發咗1982至2007年美股超級大牛市。明年奧巴馬如上台同樣帶嚟重大改變，令美國經濟返番去六十、七十 年代。改變唔係次次都向好嘅方向改變，有時係向壞嘅方向改變。奧巴馬主張嘅改變可令美元滙價短期上升，但對美股則回落，六十五天後如果佢當選，明年美股冇 眼睇。 六十年代後期美國國會通過Alternative Minimum Tax法案，向有錢人抽重稅。隨住通貨膨脹上升令愈嚟愈多美國人進入上述法案嘅範圍。喺六十年代擁有25萬美元就算係有錢人，到八十年代擁有25萬美元嘅 人又點算係有錢人？結果美國人將大量資金流向海外避稅，令美國經濟由六十年代後期開始停滯不前；明年起美國將重蹈覆轍。2000年起美國中產階級收入唔升 反跌，1％有錢人財富卻大幅上升，的確幾令群眾氣憤。奧巴馬提出改變深得中產階級嘅心；站喺投資者立場，上述嘅改變幾令人擔心。 美改變會計制度有疑慮 另一改變係美國會計制度依家係GAAP（Generally Accepted Accounting Principles）而唔係IFRS（International Financial Reporting Standard）。超過一百個國家已採用IFRS，呢個制度已成國際標準；美國最遲2014年亦要加入。美國證監要求最大嗰一百一十間上市公司（佔總市 值14％）喺2010年前先行加入，即明年起美國會計制度將由GAAP過渡到IFRS；雖然二者大同小異，採用IFRS後對投資者而言可增加透明度，但過 渡期會唔會好似去年美國會計公會要求美國金融機構按市值將債券入賬而引發次按危機？ 去年全球私人消費32萬億美元，較2006年上升11％，今年估計升幅只得2%到4％（2001至07年信貸寬鬆期內，全球私人消費上升63％。環球化、 低通脹、低入口成本、樓價上升及股市上升，都係令全球消費上升嘅部分理由。中國、印度及東歐新中產階級形成，中東、非洲及南美洲受惠於油價及糧食價格上 升，令新興國家私人消費由2000年嘅45000億美元上升至去年90000億美元）。隨住美國次按危機出現不但影響歐洲，同時更向全球擴散，消費信心受 油價及食物價格上升打擊；加上全球樓價及股市回落同商品價格高企，今年起全球消費進入低增長期。 MSCI新興市場指數去年共上升40％（雖然晚節不保）。今年滬深A股已跌52％、印度跌37％、俄羅斯跌27％、巴西跌5％、美國、歐洲、英國及日本亦唔見得好好。 據東方網消息，滬深兩地一千六百一十九家上市公司，今年中期業績平均每股盈利23.25分，較去年同期上升7.12％（去年同期每股盈利升幅達 52.6％）。賺錢有一千四百家，蝕錢有二百一十九家，虧損面達13.5％。盈利中41.7％由十四家上市銀行貢獻；電力企業賺錢空間極度萎縮，毛利率倒 數第二，唔少更陷入虧損。以純利升幅計，A股已唔再係高增長股，呢個係過去十個月A股市場急跌嘅真正理由。 展望明年，中國CPI平均升幅6.8％、巴西5.3％、印度8.4％及俄羅斯14.6％，即喺可見將來新興國家經濟形勢未能轉好。少數受惠國只剩番能源及 資源出口國，但佢地亦同時受通脹打擊，好似巴西及俄羅斯係資源出口國，明年所受打擊較少。反之，中國同印度係資源入口國，所受打擊較大。俄羅斯產品只有 5％出口美國、巴西14％、印度15％及中國20％，即中國受美國經濟放緩影響最大。 IMF估計2000年全球GDP增長率少於50％嚟自新興市場，到今年全球GDP增長率超過80％嚟自新興市場。今年佢地佔全球GDP 30％，估計到2013年達35％或28.85億美元。即新興市場加起嚟影響力漸超過美國，但明年金磚四國GDP亦進入增長放緩期。中國由去年11.9％ 下降至明年9.2％、巴西由5.4％下降至3.8％、俄羅斯由8.1％下降至7％，以及印度由9％下降至7.7％……。去年美國次按危機引發經濟放緩期， 今明兩年向外擴散；嗰D相信Decouple者過去十個月早已損失慘重。Nigel Rendell係嚟自RBC Capital Markets分析員，認為隨住經濟此消彼長，新興國家遲早有一天同OECD國家經濟Decouple，只係時間上以年為單位，而唔係以月。 去年英國金融服務佔GDP 12％，反而批發項目只佔少於4％ GDP，可以話極之唔平衡。上述趨勢由1992年開始至去年係英國金融業直線擴充嘅結果。到去年英國經濟形成金融業獨大，但踏入今年金融業開始萎縮，估計 明年繼續萎縮，令英國經濟重返平衡期，呢個調整短期帶嚟災難。英國首相白高敦上周六認為英國正面對六十年內最嚴重嘅經濟危機。英國7月份獲批樓按申請只有 二萬二千四百四十八單，較一年前減少65％，平均每單138000英鎊，較一年前減少11.9％，反映英國物業買家持保守態度。 液晶面板業步入寒冬 南非蘭特滙價因白金及黃金價格回落，8月份回落5.1％，見7.6845兌1美元。南非出產全球80％白金及10％黃金，8月份金價回落8％，白金回落17％，引發南非蘭特喺8月份大跌。 日本Nisson Rinkai建築公司上周五申請破產。受地產回落影響，令該公司資不抵債629億日圓（5.785億美元），係今年日本最大嘅申請破產公司，虧損已超過Magara建築公司。 日本政府上周五宣布提供11.5萬億日圓（1058億美元）刺激經濟計劃，包括減入息稅及增加燃料補貼，向中小企業提供貸款及政府增加開支10萬億日圓。因為今年第二季日本GDP又再出現0.6％收縮。 過去十六年日本政府共提供十五個刺激經濟計劃，作用有幾大？由1992年第一個刺激經濟計劃至家吓，效果都係短期有幫助，長期反而拖慢經濟調整。做政府亦 要狠心D，例如1973／74年香港政府完全袖手旁觀，令香港經濟喺1973／74年死去活來，但1975年又春回大地。1997年嗰次，因1998年入 市干預股市及不斷為經濟提供支持，香港經濟卻一直衰到2003年年中先有轉機，衰足六年半。 上周五馬來西亞政府宣布減稅及增加開支去對付反對黨。今年馬來西亞財赤相等於GDP 4.8％（去年3.2％），未來最高入息稅由28％減至27％；為一百一十萬個家庭提供免費電力；其次係答應明年公務員加人工；減低住宅買賣稅及增加福利 開支，令明年財赤進一步上升。林吉特今年已回落2.6％，但馬來西亞股市上周五卻大升，代表投資者歡迎政府減稅措施。今年用喺補貼麵包、煮食用油、燃料及 唔少食物支出達341億林吉特，明年將進一步增加。 南韓7月份收支赤字擴大，令8月南韓圜下跌7.1％，成為亞洲區表現最差貨幣；其次係林吉特跌4.1％、新台幣跌2.6％及泰珠跌2.1％。8月份唔少資金由東南亞流出返回美國，美元相信可進一步轉強。 今年起本港地產代理從業員可到內地執業，其中最熱門自然係廣州及深圳一帶，但執業前必需考內地執業資格試並喺三年內必須執業，唔係就要重考。首次課程今年年底前由本港地產代理監管局與廣州市房地產中介服務管理所聯合舉辦，歡迎本港地產代理從業員報名參加。 依家啱廣州資格嘅香港代理從業員只得一百多人。廣州有三萬八千名地產代理從業員，約一千一百間中介公司，每年成交量二千萬方米，其中九百萬方米係二手樓，市場好大。本港地產代理監管局亦同佛山方面協調，將協助本港地產代理執業者獲取當地執業資格。 以本港地產代理從業員嘅搏殺精神，相信喺內地中介行業大有發揮空間；亦係本港樓市淡靜下，地產代理從業員最好嘅出路。 去年液晶面板供不應求，今年第一季達高潮，唔少生產商大量投資生產設施去應付需求；今年6月大廠商聯手降低庫存，零售價開始下跌，而且愈跌愈急，估計二十 座玻璃基板窑爐今年投產，令總數由去年第四季一百一十七座上升到家吓一百三十七座，令今年產量上升25％。另有五至七條第五代生產線明年投產，令第五代產 能一下子上升40％，呢類生產小液晶屏為主嘅第五代生產線喺明年將面對很大衝擊，令明年液晶面板市場並唔樂觀。至於第六代或七點五代生產線壓力比較細D， 唔少人期望聖誕節訂單可以大增。 9月銷售旺季未到，液晶面板價格已跌到接近成本價。從6月開始連續三個月下跌已令生產商努力減產費事跌破成本價；睇嚟液晶面板價格前景唔多樂觀。 奧運並冇為液晶面板帶來井噴，6月開始售價係咁跌，估計第三季部分公司已出現虧損，第四季更令人擔心。根據市場調查機構Display Search首席代表張兵資料，十九吋售價由6月122美元跌至8月88美元，跌幅28％；二十二吋由153美元降至118美元，跌幅23％，主要零組件 亦下跌20％左右。估計年底跌幅係30％至45％，液晶面板行業嘅寒冬，今年又再次嚟到。 http://www.hkej.com/hkej_upload/dnews/220/32929/050.jpg <<轉載自信報>>
曹 仁 超 (02/09/2008): 唔再信價值投資法 9月1日，周一。恒生指數跌355.58，收20906.31；成交411億元。9月期指跌386點，收20874點，期指倒掛現象又再出現矣。 富士康（2038）下挫4.6％、思捷環球（330）跌6％，即三個交易天大跌24％，可見基金洗倉嘅威力；聯想（992）跌6.4％，收4.96元，因美國銀行、花旗及德銀等齊齊降評級。 未來十年股市係點？ 滬深三百指數跌3.45％，招商銀行跌6.6％；韓國Kospi指數跌4％，LG電子跌9.6％；台股跌3.3％，鴻海精密下跌6.9％停版；MSCI亞太指數跌8％。可見成個亞太區股市受壓。 英國7月份批出物業貸款只得三萬三千單，係九年內最少；銀碼32.3億英鎊，較6月上升2.86％；同去年7月93.5億英鎊比較跌幅好大。 格魯吉亞共拋售1.872億美元外滙（佔總儲備12.8％），去支持該國Lari滙價保持喺1.4099美元兌1Lari。 Pictet Asset Management Ltd.及Aberdeen Asset Management Plc.聯手拋售南韓圜。繼8月回落7％後，今天再跌3.2％，韓國外滙儲備連跌四個月，今年外國投資者淨拋售220億美元韓國股票（即拋售大於買入）。 今年股市下跌25％。6月同7月再拋售42億美元債券，估計未來三至六個月南韓圜將進一步回落；因資金正從亞太區流失，重返美國。 利差交易於九十年代開始，因日本政府為刺激經濟不斷減息，但九十年代日本無論股市或房地產卻冇吸引力，1994年起不斷有資金由日本流向高息貨幣好似澳元等。2001年起美國為刺激經濟亦將美元利率不斷壓低，2003年6月見1厘，資金亦從美國流向其他嘅高息貨幣。 澳元／日圓利差交易，2003至去年獲利高達62%，上述未計滙價收益。美元利差交易主要對象係歐羅及英鎊，利潤亦唔錯。 不過，好似黑社會話齋「出得嚟行，就預咗要還！」今年7月15日起美元滙價急升8%，將今年上半年利差交易嘅利潤完全抵銷，係咪利差交易進入Unwind時段？ 高盛證券過去幾年係美元大淡友，最近改為睇好，O'Neill上周五認為，未來兩年歐羅見1.2美元機會大過見1.6美元（今年7月15日歐羅見 1.604美元）。歐洲央行9月4日相信會維持利率不變，四十七位分析員中估計減息者只佔5％，理由係歐洲CPI升至十六年高位；歐洲央行認為打擊通脹係 首要任務，家吓通脹仍遠離目標通脹率2％；加上9月8日IG Metall要求加人工大過去年6.5％，呢嗰時候減息唔係畀IG Metall加人工要求更振振有詞咩？ 成思危認為，人民幣兌美元升值速度將減慢，因為美元開始對其他貨幣升值及今年兌美元已上升7％。 美國監管機構上周五接管今年第十間出事嘅Integrity銀行。呢間銀行2000年成立，今年早已資不抵債。估計FDIC要用2.5億到3.5億美元去救番佢。 花旗推介中保國際（966），估計今年每股獲利36仙，較去年減少67％，P/E四十五點五倍，目標價20.4元；中海油田服務（2883），估計今年每 股獲利66.5仙，升22.8％，P/E十三點八倍，目標價16.9元；中海石化（3983），估計今年每股獲利36.6仙，升16.1％，P/E十一點 八倍，目標價6.2元。 1987至97年係貪婪嘅十年，呢十年內愈大貪者賺到嘅錢愈大；到1997年唔少人變成貪得無厭，最終部分人變成負資產。1997至2007年係危機四伏 十年。1997年有亞洲金融風暴，亦有本港特產「八萬五房屋政策」；1998年有淡水大鱷衝擊港滙指數，後因俄羅斯債務危機令特區政府執身彩；1999年 有「千年蟲」事件，最終引發2000年科網股泡沫爆破；2001年有「九一一．慘劇」事件；2002年有英隆事件；2003年本港出現沙士事件；到 2003年下半年起港人先再有安樂日子。跟住去年10月美國次按危機，以及港股直通車計劃無法落實；今年內地有雪災及四川大地震。1997到2007年呢 十年金融市場真係多災多難。去年10月起計，未來十年又會點？十個月過去矣，大贏家係小心謹慎嘅投資者。當然亦有極成功嘅對沖基金，好似拋空金融股去買期 油者（呢個係極少數，何況一般投資者做唔到）。 信趨勢好過 過去十個月係價值投資法嘅重災區，好似Davis Advisors去年購入Ambac，後者至今回落95％；Legg Mason Value Fund揀咗K B Home及Centex，今年3月雖已止蝕，仍要蝕2.15億美元，呢個基金今年下跌28％；Third Avenue Value Fund因揀咗MBIA，令基金跌價16％。仲有美林、花旗、房利美及房貸美等。只要買入任何一隻，損失都會好大。 本港基金揀錯股而招至損失嘅亦有好多。我老曹1974年經歷和記一役後，對價值投資法早已冇晒信心。當年我老曹將和記年報睇完又睇，先決定由每股7元開始 買D，一直至2元，一共買咗十萬股，用晒手上嗰50萬元資金；最後和記股價跌落1元。1975年呢間公司宣布，有一間叫Alltrack嘅公司喺印尼經營 出租Caterpillar建築用機械業務蝕咗3000萬美元，要滙豐注資1.5億港元挽救。印尼Alltrack公司係和記旗下三百多間子公司之一，呢 間公司資產負債表亦冇喺年報刊出！叫一般投資者事前點知一間小小嘅子公司竟可整死成個和記集團。從今以後我老曹再唔信上市公司年報，改為相信趨勢。因為一 粒老鼠屎可將一煲靚湯完全毀掉；喺未出事前，有邊個會留意呢粒老鼠屎？價值投資法實在有太多漏洞，點去叫人信？過去十個月係價值投資法信徒嘅大災難（中外 都係咁）。 11月期油今天再升2.54美元，見118美元。墨西哥灣石油設施員工70％已疏散，令每日減產一百二十五萬桶石油，以及六十億九千立方呎天然氣，佔離岸 石油產量96％及天然氣產量82％。今天係美國勞動節，市場成交好少所以作唔到準，最新消息係颶風對採油設施破壞有限，油價又再回落。商品市場牛市係咪結 束？近月金價、油價及CRB商品指數嘅回落，到底係牛市結束定係中期性調整？如伊朗真係遭遇空襲，將考慮封鎖霍爾木茲海峽令中東石油運唔倒出去，如果係 真，咁就大件事。家吓油價中最少有25至30美元係反映伊朗危機，如中東局勢緩和，家吓油價只值70到80美元，如伊朗封鎖霍爾木茲海峽，油價就算見 147美元後亦阻唔住個升勢。 至於礦產價格，上半年受中國雪災及四川大地震影響，投資者擔心供應受阻而炒上。昨天四川攀枝花地震擔心又令礦產價格上升。另一方面，全球GDP增長率進入 放緩期，需求壓力喺度下降中。中國奧運之後油電價格改革問題，再次被推上前台，國家發改委宏觀經濟研究院副院長王一鳴表示，趁下半年其他資源性產品價格回 落，創造相對寬鬆環境，應盡快調整能源資源生產同消費價格體系，不應單靠壓低能源價格去控制CPI水平。如無意外電費及燃料費上調快將出台，因中國唔似印 度同周邊國家，CPI已進入雙位數上升；中國應有條件承受水、電及燃料費上升，何況中國工人今年獲大幅度加人工。 一家內地上市地產服務公司董事長喺接受《理財周報》訪問時表示，自去年11月13日深圳中天置業評估有限公司總裁蔣飛涉嫌捲巨款走佬，令公司倒閉後，創輝 租售、中大恒基、北京信一天及深圳長河地產等房地產仲介公司大量減少經營門店；加上今年1至8月全國住宅銷售面積減少11％及銷售金額減少7％，令交易規 模萎縮。以深圳房地產仲介公司為例，依家90％處於蝕錢狀態，有賴往年利潤支持。成個地產服務業今年業績下滑30%至40％。面對股市不景氣、產業調整、 次按危機及出口萎縮，再加上政府打壓需求，估計呢次地產仲介業寒冬起碼要到明年5月。 內地房價剎車漸見效 美聯物業每周樓市第十二期報告指出，央行及銀監會聯合下達關於金融促進節約集約用地通知，要求各銀行緊急限貸。另一方面，千億保險資金將進入不動產。建行 行長張建國喺中期業績發布會上表示，只對地產價格增長過快嘅八個城市地產開發貸款進行嚴格控制，但冇公布八大城市名單。一般人估計廣州、深圳及東莞好可能 進入八大銀貸城市。瀋陽市政府喺「中國．瀋陽2008秋季地產展示交易會」上宣布，重新啟動購房補貼政策，提高住房供會貸款年限及限額及降低首付款比例。 杭州市住房制度改革辦公室宣布，杭州市將放寬對經濟適用房申請者年齡限制，凡1985年前出生嘅年輕夫妻已可申請經濟適用房。另一方面，監察部、國土資源 部、財政部、住房及城鄉建設部及審計署五大部門聯合印發通知，要求各地繼續組織開展國有土地使用權出售情況嘅專項清理和檢查工作。 換言之，內地政府已明白唔好將孩子連同沖涼水一起倒掉嘅危險，喺執行緊急限貸政策下，一樣有保有壓。內地房地產經過2003至08年年初房價瘋漲後，政府 正通過一連串政策為內地房價進行剎車，以免持續走低嘅股票市場資金轉向地產市場投機。由於內地資本市場落後，房地產企業缺乏直接融資渠道，只要限制銀行貸 款，便可阻止炒房地產者造成泡沫（中國房地產企業資金70%至80％嚟自銀行貸款，相反西方國家房地產企業資金60％嚟自直接融資，例如發行房地產基 金）。喺中國只要限制銀行向房地產貸款已可剎車，令房價逐漸返去理性水平。由於中國人儲蓄率一直好高，畀樓價消化一段日子將泡沫擠掉，日後再畀銀行擴大房 地產放貸規模，便可令內地房地產逃過一次泡沫化現象。好似1998至2000年經歷三年調整後，2001至03年內地房價進入理性上升期；其後北京成功獲 得今年奧運主辦權，上海獲2010年世博會舉辦權，均刺激樓價瘋漲，今年年初已進入非理性階段。由2003至07年樓價上漲一倍或以上，今年第二季開始漸 漸穩定落嚟；加上政府一連串抑制、打擊投機行為及擠壓泡沫政策出籠，並已漸見成效。至於調整期係咪好似1998至2000年要三年時間？要事後先知道。 9月1日廣州成為全國第一個正式實施綜合性供用電地方規章。地產開發商唔可以隱瞞小區內電力規劃，禁止違法停電行為，家吓類似項目有一百六十三個，受影響 居民四萬五千戶。主要原因係不良地產商為慳番D錢而唔按規定投資永久用電工程及辦理一戶一表手續，將臨時基建用電轉供住宅用電，住戶不但承受高額電費支出 而且面對隨時停電之苦，例如遠峰大廈及大塘小區等。新規定下地產開發商必需按照規劃，先行建設配套變電設施，令居民用電合法化。符合上述嘅規定，國家才發 完工驗收完畢紙，依家只係規定先行實施一年，然後立法，確保用戶對供電可靠性及品質特殊要求，唔會無故停電。 做人要識分享 上周某教授透過森池兄話畀我老曹知「佢較我老曹叻，因為佢較我老曹有錢」；我老曹聽後微笑不語。對我老曹而言，追求財富只係人生目標其中一項。我老曹一向 將健康放喺第一位、家庭放喺第二位、子女放喺第三位、事業放喺第四位。對財富嘅睇法好以屋企嘅自來水喉，只要夠使就算，我老曹從來唔會喺屋內貯水；何況我 老曹呢D中產階級嘅財富，喺超級富豪眼中真係九牛一毛。 我老曹能夠喺解決衣食住行之餘，仲有餘錢幫吓朋友及捐獻公益事業，已好滿足。今天到銀行為農家女職業訓練學校滙上24萬港元，作為資助四川大地震後嘅孤兒 入讀農家女學校一年學費兼食宿費之用（平均每人每月需1000元人民幣）。上述款項係兩本書嘅版稅，因此亦要多謝讀者大力支持。另有一位讀者來電話，佢個 仔最近結咗婚，願意將自己嘅快樂同人地分享，將佢結婚所收嘅10萬元禮金，全數存入我老曹嘅戶口，捐贈畀農家女學校，為四川地震嘅孤兒提供一年免費食宿及 教育，上述嘅行為令人尊敬，我老曹以有呢類讀者為榮。今天我老曹一把年紀，應該學習捨得，反而你又捨唔捨得將自己財產嘅一少部分與別人分享？唔好因小善而 不為；人生最大快樂唔係你擁有幾多，而係能夠同人地分享。雖天地不仁，但人間有情；捐助唔係為乜，只係為求心中快樂。有份損款畀苗圃嘅讀者本周日請嚟分享 第四季經濟展望，並希望大家有所得着，家吓風高浪急，好易做錯決定。 <<轉載自信報>>
曹 仁 超 (03/09/2008): 對沖基金經理重新執位 9月2日，周二。恒生指數升136.15，收21042.46；成交493億元。9月期指升287點，收21160點，呢個係熊市二期典型走勢（似好非好、似淡非淡）；滬深三百指數跌1.03％，收2285.41。 上交所及深交所至8月30日止，有一千六百一十九間上市公司半年純利5533.03億元，較去年同期上升16.04%，中期加權平均每股收益23.3分， 升幅好細。如再計算兩稅合併增加咗上半年企業純利，睇到內地企業純利已由去年上半年高增長期，進入咗今年上半年低增長期。 日本人面對問題擺埋一邊 美國對沖基金到今年7月止平均蝕咗3.43％，仍跑贏標普五百指數（同期回落12.65％），但跑輸畀債券指數（同期升1.05％）。呢個1.9萬億美元 市值嘅對沖基金行業，今年首兩季新流入資金只得300億美元（去年同期1190億美元）；由於今年較難借錢作對沖用途，因此今年難有出色表現。因為基金經 理主要嘅收入嚟自分紅。因此今年佢地收入大減，唔少最一流分析員及Trader可能因此離開所屬嘅基金。相信9月結後，對沖基金經理出現重新執位情況。 今年愈嚟愈多投資者放棄基礎分析（即價值投資法）。自信貸壓碎（credit crunch）出現後，大大挑戰成個金融行業嘅運作模式！例如較高商品價格及較低GDP增長率，改變咗投資者對證券價值嘅睇法。例如航空及汽車製造股，紛 紛跌穿過去被認為嘅合理價；通用汽車由30美元跌至10美元，跌幅超過66％；花旗銀行股價喺一個月內波幅可以達到70％；房利美及房貸美亦打破人們對政 府支持企業（GSE）嘅睇法。對沖基金雖然今年上半年大部分蝕錢，但已漸成投資市場嘅主流思想，即同時睇好及睇淡唔同行業股份，投資策略引用對沖概念。 家吓七十二歲、上任唔夠一年嘅日本首相福田康夫，本周一宣布辭職，因今年第二季日本GDP收縮2.4％，上周五佢提出刺激經濟方案被認為「老餅」唔獲國會 支持，其職位或將由今年六十七歲、一向以能言善辯出名嘅麻生太郎繼任；佢計劃增加政府開支去刺激經濟，暫時唔理會國家巨大負債。日本政府今年總負債係 GDP 148％（美國政府係62％）。雖然日圓利率咁低，日本政府每年財務負擔仍佔去稅收四分一。日本銀行面對0.5厘利率，以後減唔減息對經濟分別唔大。加上 7月份CPI上升2.4％，日本政府可以話係無晒計。 一個國家經濟前景好多時同佢地嘅民族性格有關。日本人喜歡鑽研，好似花道及茶道等可見到日本人嘅一絲不茍精神，每一細節代代相傳達到最精緻境界。呢個係日本產品無論汽車到電子產品，品質皆能達致世界一流水平嘅理由；呢個係日本經濟能從戰後廢墟中崛起嘅理由。 1971年我老曹曾跟一位日本人學習陰陽燭走勢。佢係日本國家商品期貨公司港區副主席，嗰時已發現佢服務緊嗰間公司財政方面有問題，佢自己亦知道，我老曹 問佢點解唔即刻將佢糾正？佢話畀我老曹知，日本人認為問題可以隨時間過去而消失；積極去糾正問題反而引起公司員工之間不和。換言之，日本人當面對問題時常 用擺埋一邊嘅方法而唔去解決，除非到咗非解決不可嘅地步為止。1974年呢間期貨公司宣布破產，嗰位日本人亦回國去矣。日本人呢種性格令佢地嘅經濟自 1990年至今仲係咁，因佢地相信隨時間過去問題會自動消失，除非無法忍受先改變。 最近南韓情況都幾令人擔心。KOSPI指數由去年11月1日2085點回落到近日1400點，跌幅32％。滙價已好接近2004年11月3日1116南韓圜兌1美元（當時外資開始大量湧入），一旦失守可以加速南韓圜回落。 今天泰銖繼續下跌，泰國股市跌至十九個月內低位，主因係政局動盪。今年海外投資者淨沽出31億美元泰國股票；不過，8月份CPI升幅已下降至6.4％（7月9.2％），情況冇表面睇咁差。 印度股市亦令人擔心。家吓五十九歲嘅蘇巴勞出任儲備銀行新主席，佢主張加息去對付通脹，以便將十六年內最高CPI升幅壓落嚟。明年5月印度大選，上月通脹 率12.6％，因政府減少燃油補貼及宣布公務員加薪21％。面對12.6％ CPI升幅，9厘息係無法壓抑通脹率。今年第二季印度GDP升幅已降至7.9％，加上超過一半人口每日生活費只得2美元，如GDP進一步下滑，明年5月執 政黨亦需落台。 鳥巢水立方大轉型 南非股市8月份下跌3.1％，主因係白金價格大跌，令白金礦股大幅回落；其他好似銅礦及煤礦等亦下滑。如商品價格進入熊市，南非前景將轉為暗淡。 巴西股市周一跌幅係全拉丁美洲中最大，因金屬價同油價回落令礦務及能源股大跌。 美滙指數升至六個月內新高【圖】，加上50天移動平均線（74.23）重返200天線（74.22）之上，確認美元進入牛市。英鎊見1.7863美元。係 2006年4月以嚟最低；歐羅見1.4557美元係今年2月14日以嚟最低；澳元見84.69美仙，係今年9月以嚟最低，估計澳洲將減息。 奧運之後鳥巢、水立方及奧運村點轉型？鳥巢業主北京中信聯合體體育場運營公司計劃將佢改建為購物、餐飲及演出場所，改動主要集中响下層看台，但保留整個鳥 巢形狀畀遊客參觀。水立方分為七大運營板塊，包括商業樓、網球場、熱身廳、戲水樂園及商業區，成為全北京最大水上遊樂中心，將於年底動工。一萬七千個座椅 將拆掉其中一萬一千個及保留21.4％總面積，作日後大型游泳賽事用；其餘大部分面積改為水上樂園，如人造衝浪海灘、健身、培訓及水上娛樂。至於奧運村內 今年10月起部分改為會展、商業、酒店及寫字樓；奧運村住房70％已預售，家吓喺度加建廚房設施、明年上半年交房後成為住宅區；至於五棵松場館則保留畀遊 客參觀。 奧運之後中國基建全速上馬去減慢經濟下滑速度。9月1日人行要求各銀行落實「區別對待，有保有壓」方針。向三農及小企業增加信貸、支持災後重建，以及對出口型中小企業信貸放鬆，但整體信貸仍然從緊。 北京和上海之間新高速鐵路2012年通車，時速由三百五十公里提升到三百八十公里，全長一千三百一十八公里，日後北京到上海只需五小時；由中國自己生產時速三百八十公里列車，最先用喺京滬高鐵。 京津快速今年8月已運營，時速可達三百九十四點三公里，未來中國各大城市交通主力係高鐵。 內地一線城市政府為配合中央政府政策忙於擠走泡沫，反而二三線城鎮政府卻趁機製造泡沫。7月份銀川、烏魯木齊及太原樓價仍較去年同期上升14.3％、13.9％及12.4％，其他如海口、寧波、蚌埠、蘭州、長春及無錫亦有唔錯嘅升幅。 喺OECD國家，普通住房售價係中產階級家庭年收入六倍便算合理，超過便視為有泡沫成分。家吓北京、深圳及廣州係十三倍，上海係十一倍，你話點算?! 中國須搵出經濟平衡點 面對「金九銀十」萬科上海八個樓盤以減價促銷，新盤未賣出卻引發前期買樓嘅人退房呼聲。例如金色雅築今年3月至今已減價三次，最先購房者賬面冇咗幾十萬 元，因呎價由最高18000元一平方米跌至家吓14000元（促銷價係12000元），引致已買樓嘅人要求退房。萬科冇正面回應，退房團表示將訴諸法律， 如照香港法律係冇得退。 中國經濟經過三十年高增長後擔心將進入下行經濟。如中國GDP增長率由去年第二季12.5％下降到今年第四季9.6％，滬深A股P/E將由去年高P/E進 入明年低P/E；未來調整壓力仲好大。今年內珠三角一帶超過二萬間中小型工廠執笠，中國每年新增勞動力二千萬人，點樣喺咁嘅經濟過度期，利用政府基建開支 去吸收新增勞動人口對工作崗位嘅需求？ 根據菲利普斯曲線理論（Philip's Curve），GDP過快增長必然導致高通脹，因此雙位數字GDP增長率通常只能出現喺經濟起飛期（例如1978至2007年），而唔可以長期維持。理由 係工業化帶動能源及原材料需求上升，而城市化亦推動糧食價格及城市樓價上升，需求大過供應便可將價格推上。過去三十年中國GDP能夠急升理由係建基於壓低 工人嘅工資及犧牲咗環境資源，把全國資源用喺出口方面而壓抑中國人本身需求。換言之，過去三十年GDP高增長建基喺扭曲價格方式進行（包括人民幣滙價偏 低），呢個情況必然造成資源浪費及環境污染，長期壓抑人民福利改進及盲目追求GDP高增長係唔可能長期化，而且國際間亦唔容許。奧運之後，中國經濟必需喺 通脹率與GDP增長率之間搵出平衡點。過去低通脹高GDP增長率嘅時段將一去不返，如處理唔好中國經濟下滑速度將加快。一般人認為CPI增長率7％已係極 限。唔適宜超過；GDP增長率8％亦係極限不應低過。如何達到「壓七保八」？何況政府目標通脹係4％，即CPI升幅少於4％政府才會放鬆銀根，估計要到明 年5月先有機會。 人口紅利消失 第二次世界大戰後自由世界國家亦曾以GDP年率9％速度增長，令1973年出現石油危機。中國過去三十年保持GDP平均年率9.8％，自然都唔例外。根據 林毅夫等人估算結果，2004至2014年中國增長率應為8.56％，2014至2024年應為7.08％；王小魯等人較悲觀，認為2011至2020年 中國GDP年增長率只有6.21％。雖然兩位知名人士估算結果唔同，但原因卻一樣，即中國人由資本積累及高儲蓄率轉為擴大消費及農村勞動力完成轉移到城 市，令人口紅利冇晒。 無論全世界邊一個國家，GDP維持三十年左右高增長後（有D長D，例如三十三年；有D短D，例如二十七年），必然出現GDP由高增長轉向低增長；由資本積 累轉向擴大消費，令股市由高P/E（因資本大量積累結果）走向低P/E（進入擴大消費期）。例如1992年台灣及2007年中國股市。中國股市更有大小非 問題，過去因限制大小非流通股流入市場，造成去年10月前非理性上升，近期又因大小非流通股逐步轉為全流通而加大股市下跌速度。 今年共有一千五百四十九億三千九百萬股大小非股解禁，相等於去年年底滬深兩市總流通股33％；明年更達逾六千八百九十億股，相等於去年年率總流通率一點五 倍；2010年仍相等於去年年底總股本76％。即三年後A股流通量上升二點六倍，理論上，A股P/E應同本港H股P/E睇齊，家吓仍高出13%；到時A股 股價將反映公司業績而唔係供求。 <<轉載自信報>>
投資者日記 [曹仁超] 2008 09 04 聖買蝕本公司 9月3日，周三。恒指跌457.4，收20585.06；成交560億元。9月期指收20544點，跌616點；10月收20530點，跌645點。恒指倒掛現象又出現，睇嚟大市繼續向20000點支持位挑戰。 中國鋁業（2600）跌6.4％，收6.46元；紫金礦業（2899）重挫6.8％，收4.52元；江銅（358）跌6.5％，收11.16元；中國海洋石油（883）大挫6％，收10.7元；路透／Jeffries CRB商品指數創3月19日以嚟最大跌幅。 買股票都要靠運 滙源果汁（1886）升164％，收10.94元，較停牌前升二倍。我老曹去年曾買入多少，今天喺11.08元出貨，收市10.94元，因可口可樂公布以每股12.2元收購；安德利果汁（8259）亦升7.4％，收0.58元。買股票有時「運氣」都幾重要。 可口可樂以24億美元收購滙源果汁66％股權，但必需經中國反壟斷審查認批才可。以收購價12.2元計，今年預測P/E四十一倍，依家滙源佔中國100%果汁市場42.6％及中濃度果汁市場39.6％。 周二油價及金價大跌部分理由係38億美元嘅Ospraie Management宣布結業，理由係表現唔理想（全年下跌38％，淨係8月下跌27％），過去三星期喺度大量拋售能源、原材料及礦務股，將D資金還畀基金持有人（唔少基金有呢個限制，例如蝕到某一水平便自動結業將D錢還畀基金持有人）。 UBS嘅John Reade認為不應係單獨事件，因唔少資源基金今年7、8月份損失好大，需要執笠嘅資源基金數目唔少，令9月份能源及礦務股面對嘅壓力好大。 油價第四天下跌，見107.32美元，估計100美元左右先有支持。 金融體系嘅麻煩漸變成環球經濟增長放緩，造成商品價格急跌。唔少商品價格跌幅已達30％，反而7月15日起美國金融股唔少反彈16％。亞太區股市卻成為重災區，例如南韓跌26％、印度跌25.8％及日本跌17.6％；而滬深三百指數更加不值一提，今天再跌1.73％，收2245.96。今年中國外部需求放緩，令出口型中小企業喺央行緊縮信貸調控、人民幣升值及工資上升壓力下，處境變得好艱難。6月份已有數字證明熱錢由中國股市流出，今年A股總市值縮水14.66萬億元人民幣。政府希望擴大內需去支持經濟，但市場人氣唔夠及內房股集體跳水；加上7月15日起全球商品價格下跌令西山煤電及中國神華等煤炭能源股亦不保；其他資源股就更加No Eye See。市場傳出央行或出新政策打擊貸款違規進入股市及房地產，令今天金融股及地產股亦加入跳水行列，例如中國海外（688）跌6％、雅居樂（3383）跌6.5％、首創置業（2868）跌5.8％及世茂房地產（813）跌5.35％；甚至酒店股如香格里拉（069）亦難逃厄運。 花旗推介華潤電力（836），估計今年每股獲利64仙，減少18.5％，P/E三十點一倍，目標價23元；第一太平（142）估計今年每股獲利7美仙，升21.6％，P/E八點六倍，目標價6.1元；深高速（548）估計今年每股獲利29.6分人民幣，減少9.5％，P/E十一點一倍，目標價4.7元。我老曹亦幾睇好第一太平，理由係睇好棕櫚油前景。 信貸壓碎有誤導 截至6月30日止，中國上市四大銀行共持有232.8億美元兩房保證（或發行）債券。7月底止中國銀行（3988）表示已減持46億美元，至173億美元；建行（939）表示已減持20億美元；交通銀行（3328）出售2700萬美元；工商銀行（1398）由於只持有27億美元所以仍未處理；估計內地銀行仍會進一步減持兩房保證（或發行）債券。 9月15日Commodity Futures Trading Commission（CFTC）將喺美國國會上回應點樣增加商品買賣市場透明度。上述係今年6月指令，目的係證明油價上升唔係因需求急升而係炒家入市。有足夠證據後，國會將立法制止；打算12月18日通過向代替能源提供稅務優惠，藉此打擊油價，最遲12月31日。呢個法例影響未來油價走勢。雖然近日油價回落，仍較一年前高出55％。DJ-AIG商品指數7月中至今回落20％，令三角航空升17％及洲際航空升16％。 金價今年3月最高見1030.7美元，最低係8月15日見772.98美元。技術上睇金價跌穿772.98美元先有機會完成調整，因為底部通常都係高低腳或低高腳，金價必需再次下試772.98美元先完成調整。 古斯塔夫颶風轉弱，油價同金價已立即急跌，係咪代表商品市場牛市今年已結束？依家客觀環境仍係負利率3厘（利率低於CPI升幅），情況仲係咁，一旦由負利率環境轉為正利率，商品市場會點？ 自從去年8月出現次按危機後，本欄常用信貸壓碎（credit crunch）去形容，似乎有D誤導；正確D嚟講係另一大趨勢開始！喺長波中（Long cycles），利率時高時低，有時有實質利率、亦有時係負利率。由1980至2004年利率大方向係向下，理由係經濟環球化，嚟自新興經濟國家產品入口，壓抑OECD國家嘅CPI升幅，令OECD國家可採取寬鬆貨幣政策刺激抵押品如房地產、股票及債券紛紛升值，令OECD國家人民可以借更多，因此增加消費，令更多新興經濟國家產品入口。二十五年（1982至2007年）後，借錢嘅人漸無能力還債，引發次按危機。財務機構開始收緊貸款條件，令抵押品無論物業、股票及債券皆跌價，上述先係大趨勢！各國央行面對信貸壓碎紛紛注資；美國更大幅減息，不惜出現負利率（CPI升幅5.6％，利率只有2厘）。不過，利率大方向係加息，因為嚟自環球化嘅紅利已派完，無論中國或印度亦面對通脹壓力，無法廉價出口產品矣。家吓美國嘅負利率環境只可短期維持，最終仲係重返CPI升幅2厘或以上。加上抵押品不斷跌價，邊度喺放寬信貸條件？最終因資產價格下跌引發通縮（例如1990年至今，日本企業唔再擴張、工作崗位愈嚟愈難搵，甚至物價上升，人人亦只有減少消費，因為佢地感到窮咗而唔係富有咗）。 穆廸唔敢降評級 過去兩年美國物業市場冇咗17000億美元市值；加上過去一年美國金融市場無論股票及次級債券亦以驚人速度下跌。上述壓力部分被去年9月至今年4月利率由5.25厘降至2厘，以及美元滙價下跌8％所抵銷；不過，今年3月至今金價下跌20％；今年7月至今油價下跌25％；即係代表信貸收縮壓力漸漸令通縮打贏通脹。今年7月美國CPI升幅5.6％，唔係見頂都相信距離見頂日唔遠。再睇美國M2（因政府已唔再公布M3），增幅最大係2001年「九一一．慘劇」後，當年達10％，但其後增幅已減少至5％，近三年又再上升到7％，最近又再減少，因此亦唔會出現類似七十年代CPI嘅升幅。 喺咁嘅情況下投資市場已變成戰場，經濟喺mumbo-jumbo。一陣間農產品吃香、一陣間係金屬產品、一陣間係石油。從第二次世界大戰結束至今過去六十多年，無論農產品、金屬甚至石油都係boom & bust行業；高潮喺1974、1980及今年出現；明年係點，木宰羊。 股價短期由投資者情緒決定、長期由基本因素決定、大趨勢由基本因素決定方向，投資者情緒只可令股市P/E由六倍到五十倍之間波動（OECD國家P/E由六倍到三十倍之間波動）。去年10月標普五百P/E上升到二十五點八倍，肯定進入牛市第三期，分析員估計最少跌幅26％，即家吓仍未完成最少跌幅。 股聖畢非德嘅成功就係六十、七十年代揸住現金。當年大把平靚正美股可供選擇，家吓嘅佢亦揸住280億美元現金，亦有大把平貨可供選擇。例如近期入股HomeServices of America Inc.（美國第二大地產代理公司），呢間公司2005年賺1.45億美元見頂，去年利潤已回落到4200萬美元，今年上半年稅前利潤200萬美元，恐怕今年下半年進入虧損，但穆廸公司唔敢降佢信用評級，因為佢嘅主席Ron Peltier搵到巴郡入股，有咁勁嘅現金作後盾。你又有冇膽量投資短期蝕本嘅公司？ 中國產品以質取勝保GDP 中國經濟已結束高GDP增長及CPI低增長時代。GDP增長率因出口增幅由去年第二季12.5％將回落到今年第四季9.6％。中國製造業由1993年佔全球製造業比重3.5％上升到2006年14％，排名僅次於美國。和美國唔同嘅係美國製造業係高附加值產品，中國產品只係價廉物美。隨住2005年7月至今人民幣升值20％，中國工資大幅上升及環保條例逐漸嚴格後，中國製造嘅優點漸減少。以聯想（992）為例，去年營業額係美國惠普公司16.1％，利潤水平係美國惠普4.1％。因聯想產品仍以薄利多銷取勝。 中國裝備業佔整個製造業比重少於30％，德國係46.6％、日本係43.6％及美國係41.9％。中國工廠裝備仍以入口外國裝備為主，仍未中國化，其中發電設備90％入口；集成電路芯片製造設備85％入口；石化設備80％入口；汽車、紡織機及印刷70％入口。換言之，中國工業仍以加工產業為主，而唔係裝備工業。因此只能微中取利，因市場競爭大。例如聯想電腦內嘅芯片及軟件都以入口為主，結果電腦售價中30％用嚟畀知識產權，聯想自己只能微中取利。 未來中國GDP能否保持高速增長？便看中國製造業可唔可以由低成本競爭策略轉為以產品質量取勝。提供高附加值產品，由加工產業走向裝備產業（工廠中嘅工廠），唔係就會好似東南亞國家九十年代面對中國人民幣大幅貶值後，訂單去咗中國而出現1997年亞洲金融風暴而結束東南亞GDP高增長期。明年中國政府將全力八保；通脹率依家最高係今年5月8.7％，呢個已遠離人行目標通脹4％，正努力將佢壓低到7％或以下。由於中國汽油價、糧食價、水費及電費同全球脫節，一旦放鬆，中國CPI升幅高出7％係好容易嘅事。當前宏調政策基本思路仍係堅持貨幣政策從緊，只對個別行業及個別地區放寬。調高存款利率及存款準備金率係雙刃劍，一方面可壓抑需求、另一方面亦提高資金成本，最終可成功壓抑通脹率，但同時帶來GDP增長率大幅下滑。 另一可行方法係減稅，例如提高個人入息稅；取消利息稅、增值稅、營業稅及增加福利開支。咁樣可刺激消費、降低儲蓄率及加強內需動力，步入OECD國家式經濟，即國窮民富，而唔係家吓嘅國富民窮。加快第三產業發展速度。 今年起中國經濟下行形勢已出現，製造業信貸風險及房地產信貸風險喺度上升，形成內地銀行喺貸款方面自動收緊，進一步影響GDP增長率。
9月2日的还有一句，看到俺就笑啊，哈哈哈哈。 价值投资法实在有太多漏洞，怎么去叫人信？过去十个月是价值投资法信徒的大灾难（中外都是如此）。 我私人便顺便提道最大只的价值投资老妖怪巴菲特这老鬼的投资公司股价都是疯狂下挫的啊，趋势一日未到底部转势期，盲目地背一个价值投资旗子杀入介只美女如云滴市场便是没有好的结果，色如刮骨钢刀，中美人计便是去死去死啊！
曹 仁 超 (05/09/2008): 人生中三次好機會 9月4日，周四。恒生指數跌195.58，收20389.48；成交564.61億元。9月期指跌303點，收20240點。富士康（2038）跌3％， 收5.12元；裕元（551）跌2.8％，收20.8元；中國遠洋（1919）挫6.2％，收12.4元；中國交通建設（1800）大跌14％，收 10.74元，因花旗集團建議賣出。 滬深三百指數升0.23％，收2251.15。 英國樓價8月份較去年同期下跌12.7％，係1983年以嚟最大跌幅，較7月份跌1.8％。英倫銀行唔減息，英鎊企穩1.7821美元；英國物業前景展望繼續下滑。我老曹最後一間英國樓賣咗大半年，終於忍痛照買家價賣掉，9月3日成交矣。 德國工廠訂單7月份較6月份回落1.7％，德國第二季GDP已收縮0.5％，如第三季仍收縮就確認衰退。歐羅進一步回落至1.449美元，估計短期內失守1.4美元。德國汽車銷售8月份下降10％，零售業連跌兩個月；歐羅區CPI升幅已回落到3.8％（7月份4％）。 油價回落到109.34美元，9月9日OPEC開會，相信仍無意減產，估計年底前可見100美元一桶。 花旗推介中國電力（2380），估計今年每股獲利12.9仙，減21.4％，P/E十五點一倍，目標價2.9元；中材股份（1893）估計今年每股獲利20.8仙，升6.3％，P/E二十二點九倍，目標價7.35元。 二線股尋寶遊戲開始 花旗認為全球信貸收緊，令大部分商品及製造業股回落，情況仲會繼續六至九個月。農產品全球仍有大量未使用嘅Capacity，俄羅斯仍有八千六百萬英畝嘅 集體農莊，生產力好差；只要農產品有價，私人企業可把呢D接近被荒置嘅農莊企業化，產量可以喺家吓嘅四倍及令大量被荒置嘅土地恢復生產。俄羅斯擁有全球 7％可耕地，甚至超過全中國，人口只有一億四千二百萬，得中國11％。中國糧食可自足自給，如俄羅斯全力發展農業，甚至以沙皇時代嘅生產力，佢嘅農產品仍 可養活全球五分一人口。如以先進技術去管理呢D農莊，應可養活全球二十億人口，只係喺共產政權下，先令呢個一百年前嘅農產品出口大國，變成民不聊生。俄羅 斯亦有豐富嘅石油資源同礦藏量好驚人，只係一直以嚟冇好好開採。當然仲有非洲呢個仍未被大量開發嘅大洲。 地球出現糧食、能源及礦產唔夠，只係因為一般國家政府無能，令國民無法達到溫飽。例如三十年前嘅中國。 7月份仲有唔少人睇油價可見200美元，呢種分析令油價喺7月15日見147.27美元，其後回落27％，喺本周三見108美元。沙地阿拉伯喺7月份仲增 產，美國消耗量喺今年上半年每天減少八十萬桶，係二十六年嚟首次。結果令7月15日至今對沖基金及石油Traders喺期油市場蝕咗超過200億美元，呢 個係近日油價下跌嘅理由，過去七星期係石油好友大屠殺期。 7月15日起美元開始「帝國反擊戰」並迅速收回失地。商品價格大幅回落，反而金融股上升超過16％。 摩通認為印度快進入嫁娶月，估計未來金價可回升11％，即由8月15日772.98美元升上850美元。 繼滙源果汁（1886）後，金威啤酒（124）股價一度急升，睇嚟二線股尋寶遊戲喺今個月開始。今年5月我老曹建議大家Sell in May and walk away。9月份建議參加尋寶遊戲，因為二線股經過十個月大跌後，未來下跌空間唔大。 1984年11月19日Amgen Inc.（喺納指上市）每股3.63美元，2005年每股85美元；加上過去二十三年五次拆細，即1984年每股股價只有9美仙；今天呢間公司已成為市值 1000億美元嘅藥物股（生產香港風濕痛症、關節炎、貧血及牛皮癬等藥物），二十三年內股價升幅接近一千倍！喺1984年1萬美元投資可變成1000萬美 元；呢個就係二線股吸引力。 科網股泡沫？Done！滬深A股？Done！石油泡沫？Done！玉米及小麥泡沫？Done！過去八年幾多人連件T裇都輸埋？但有一點可以肯定，喺世界上 遲早又有另一泡沫出現，只係唔再係CDO、金磚四國或房地產（一個泡沫之後，二十年內好難喺同一行業出現另一個泡沫）。有人認為繼金磚四國後係FIG（法 國、意大利及德國）；因為中國及印度中產階級冒起，佢地鍾意法國時裝、意大利手袋及德國汽車，令法國、意大利及德國品牌公司利潤暴升！ 印尼計劃將利率提升0.25厘至9.25厘，去支持印尼盧比。上月CPI上升11.85％（7月份升11.9％），6月份批發物價升34.7％，係九年內 最高，政府目標通脹率只係6.5％至7.5％；加上棕櫚油由3月份至今回落44％，至1303美元一噸，7月份出口升25.5％（6月份出口升 34.9％）。 刺激經濟計劃長遠有害 中國計劃明年採用新VAT系統，令八百萬間零售公司可用固定資產投資代替畀VAT稅，呢個目的係刺激零售業投資固定資產，協助零售業拓展市場。 繼日本8月26日將經濟刺激計劃提上議程後，9月1日韓國政府亦宣布總額190億美元減稅措施。英國政府9月2日推出一籃子計劃拯救低迷嘅樓市。白高敦計 劃向石油公司抽稅去補貼英國房地產，可惜暴利稅仍未喺國會通過，油價已大跌。計劃中向貧窮家庭提供一次過100英鎊燃油補貼資金唔知由邊度嚟？其次油公司 批評石油暴利稅打擊計劃中嘅1000億英鎊能源工業投資，可能棄英國而移到別國（家吓英國係對外國能源公司最開放國家之一，呢個稅項未必令石油公司離英國 而去，但打擊投資欲就幾肯定）。佢提出用10億英鎊去協助第一次買樓者及挽救負資產者亦唔獲好評。自由民主黨領袖貝萊格認為政府係行賄市民喺跌市中置業， 結果可能害死佢地！睇落白高敦幾麻煩。 法國亦向歐盟各成員國提出一項應對經濟下滑計劃，主張歐盟採取擴張性財政政策同減息；9月12至13日喺尼斯舉行嘅歐盟財長會議上提出；加上今年6月份美 國政府為刺激經濟，而寄出780億美元支票嘅1680億美元刺激經濟計劃，似乎刺激經濟方案已成為西方政府嘅「白花油」（能醫百病）。西方經濟（尤其係美 國）最大問題係消費太多，儲蓄太少；喺咁嘅失衡經濟結構下，政府繼續刺激消費，只能推高一、兩季GDP增長率，時間一長，政府赤字進一步上升，令利率上 升，對長期經濟負面影響仲大。日本政府喺過去十五年刺激經濟方案一再推出，結果只令日本政府負債纍纍。 依家連中國亦有刺激經濟方案，作用又點？依家中國GDP增長率咁高仲去刺激經濟，又係咪啱呢？ 上周萬科上海樓盤促銷好成功。8月30及31日共賣出一百七十六套房屋，收入2.68億元，但已唔及今年元宵節時，上海九五折賣樓，八小時內共賣咗一百七十幾套，金額2.57億元。 萬科喺上海嘅金色雅築，去年9月14日開售至今已係第三次減價。結果不但引來退房糾紛，亦令其他買家擔心；一D開發商被迫發「保證宣言」。以1997至 2003年香港樓市經驗，喺樓市調整初期應先下手為強，最先減價嘅發展商，最後反而成為最強，唔減價嘅發展商最後被迫賤價拋售。 GDP依賴股樓好危險 上海中原研究諮詢部經理馬冀表示，近期市場冷淡局面係受到上海政府決定喺五年內建四千萬方米經濟適用房同廉租房嘅政策影響，令中下價樓面對好大競爭。呢個 政策去年9月27日已宣布，令普通老百姓開始觀望。醒目嘅發展商喺上述項目未推出市場前，就提早減價賣樓；估計明年經濟適用房推出後，上海樓市好似香港咁 出現兩極化（即豪宅繼續升值中下價樓下跌或停滯不前）。 衛明不動產智庫負責人蔡為民更悲觀，認為上海樓價未來跌幅達到20%至25％。復旦大學房地產研究中心主任尹伯成比較樂觀D，認為跌幅只有15%至20％。 萬科喺上海八個樓盤進行中秋促銷後，9月3日把杭州旗下四個項目共二百二十六套房源價格下調，推出為期十二天嘅青年置業計劃，最低達七五折。包括白鷺郡 東、白鷺郡南、魅力之城及逸品閣。由9月3至14日止，大部分係九十方米以下，折扣係七五至八折。9月3日一天內售出一百零五套，佔全部推出套房46％。 南京兩個項目亦減價，最低折扣達到八折，即金域緹香七十方米型及萬科紅郡五十方米型，前者由11500元一方米降至9200元；紅郡一套五十平方米房子賣45萬元。 萬科係內地房地產業界領軍大佬，一舉一動對中國房地產發展影響好大，內地房地產老總唔少平時口口聲聲話要學習「萬科好榜樣」。點知去年房價狂飆時，王石提 出「拐點論」卻冇人聽，因接受唔嚟；呢次萬科喺全國大幅調整樓價，其他地產老總卻認為萬科點會咁樣？所謂學習萬科只係一句空話；內地房產老總仍唔接受樓價 可升可跌！仲希望「九金十銀」，反而萬科卻搵機會大量套現。 去年上海市發言人表示，上海證券業及房地產業等全市GDP增長貢獻係19％，今年上半年對GDP增長貢獻就係零，地產更係負0.4％。 任何大城市GDP如過分依賴股市及樓市係好危險嘅事，好似1990年日本東京、1997年7月香港、2007年紐約及倫敦。如把樓市泡沫吹得太大、投機太 嚴重，一下子將樓價炒得太高，經濟繁榮完全依賴股市及樓價上升拉動。一旦呢個泡沫被刺破，往往係好難醫番，日本就係一個最好例子，甚至香港到2003年依 賴自由行、CEPA及內地公司大舉來港上市。去年香港經濟繁榮仍唔及1997年，家吓又再面對港股直通車泡沫，內地經濟基礎未穩，更加唔應該畀股市及樓市 泡沫過分吹大，以免尾大不掉。 日夜磨練累積財富 中國經濟增長三大引擎係出口、消費及投資。依家出口放緩已好明顯，中國採購經理指數7月份係48.4，係2005年1月份面世以嚟首次低過50，代表中國 製造業已陷入衰退，工業生產增長可能降至14％。明年中國GDP增長率有可能低過8％，因出口新訂單指數三個月內由58.9跌至46.7。北京及周邊城市 GDP佔全國8.4％，為咗奧運其中三分一生產停頓兩個月，令中國全年GDP少0.2％至0.4％。航空乘客流量亦出現負增長、汽車銷售不景及家用電器滯 銷，令中國境內消費出現下滑，內需新訂單由4月份65點急降至7月份46.2，相信同財富效應消失有關。家吓增長有賴政府投資，最近推出「一保一控」政 策，採取「反周期性措施」，即中國三大增長引擎只有一個仲如常運作。 2001至06年美國樓市泡沫超過1990至2000年科網股泡沫，令美國經濟衰退不致出現，樓價上升所產生嘅財富效應，令美國經濟一直保持繁榮。 2006年7月起樓價回落後第一個利淡訊號係Countrywide Financial喺去年8月6日申請第十一章（破產保護令），嗰時股價已回落85％。其後Lennar Homes宣布由2005／06年獲利5.937億美元，轉為2006／07年蝕19億美元。銀行手上CDO出事，令貝爾斯登利潤下降89％、花旗回落 83％，同埋美林蝕咗80億美元。今年7月15日美國證監宣布唔准十八隻金融股「裸空」，令金融股出現反彈。相信下跌第一浪完成，進入一段日子平靜期，但 唔代表危機已過去。 哥倫比亞商業學院教授Bruce Greenwald認為，投資理論鼻祖格拉咸及多德嘅理論，寫喺1934年美國經濟大蕭條之後，呢類大蕭條好似洪水（千年難得一見），股聖畢非德用佢嘅理 論喺六十及七十年代投資美股，正好趕上美股1982至2007年嘅超級大牛市。家吓泡沫一個接一個出現，甚至股聖亦只有揸住280億美元現金而無處落手； 家吓嘅世界已係對沖基金天下，投資係點樣估計未來而唔係賤價買入優質股（依家仲有幾多優質股賤價出售？）。如賤價買咗優質股，揸住十年八年一樣可以唔升反 跌。格拉咸及多德生活嘅時代，股票市場仲係散戶天下，基金接近唔存在，所以較易搵到滄海遺珠。 今天股市已係基金天下，佢地每天二十四小時去留意全球股市找尋投資項目，一般散戶搵到滄海遺珠嘅機會有幾大？另一理論由Barpost Group負責人Seth Klarman提出，點解云云眾生中只有股聖能充分掌握價值投資法，大學入面咁多教授反而唔得？如人人能夠掌握，股市唔係變成有效率市場，結果你揸咩都冇 分別？ 日本股神是川銀藏話，每個人終其一生，都會碰到三次大好機會，只要把握其中一個已可衣食無憂；如能把握其中兩個可成為小富；能三個亦把握到，便可大富大貴。可唔可以及時把握，就要睇平時努力與身心磨練矣。 磨練係咩意思？就係學習理論然後與實踐結合；加上日夜思考嘅訓練，形成喺重大決斷時只憑直覺便可決勝（呢個直覺唔係天生就有，而係日夜磨練嘅結果。一如奧 運跳水員，跳水姿勢咁優美背後係日夜咁訓練）。唔係喺股票賺錢時快樂、股票跌價時沮喪。我老曹1969至73年曾快快樂樂地喺股市賺錢，以為喺股市中賺錢 好易，面對1974年超級大熊市，差一D被淹沒。好彩當年後生，從此痛下苦工，明白股票嘅錢唔係咁易賺。過去三十三年學曉喺牛市中累積財富，喺熊市中持盈 保泰。1981／82、87、97及2007年10月熊市，都算我老曹幾好彩。 跌市要睇開D先有健康 累積財富三大層面；一、滙市；二、股市；三、房地產，背後都係日夜磨練。 1967到74年對我老曹嚟講係水過鴨背（賺得快、蝕得快）；1975到2007年係財富累積期。可唔可以好似是川銀藏咁面對人生第三個大好機會時，再將財富翻兩番。 一生人有三次大好機會，因此唔好因一次跌倒而放棄未來兩個。 許多人認為健康嘅人先至快樂。根據Mohammad Siahpush博士領導嘅俄馬哈市內Nebraska大學醫療中心，向一萬個成年人由2001至04年追查結果卻相反。唔係健康令人快樂。而係快樂令人 健康。研究報告喺9月份American Journal of Health Promotion發表。過去佢地每四星期向接受調查一干人等問過去日子健康情況及係咪快樂。發現佢地快樂之時健康狀況最佳；情緒低落時易病。因此 Siahpush建議，經常保持自己處於快樂心態可長保健康，咁樣較食保健產品仲有用。朋友，喺跌市中你快樂嗎？其實只要一切睇開D，做人就快樂D，健康 亦好D。 <<轉載自信報>>
磨練係咩意思？就係學習理論然後與實踐結合；加上日夜思考嘅訓練，形成喺重大決斷時只憑直覺便可決勝（呢個直覺唔係天生就有，而係日夜磨練嘅結果。一如奧 運跳水員，跳水姿勢咁優美背後係日夜咁訓練 ----------------------------------- 译文：磨练是什么意思呢？就是理论和实际相结合，加上日夜的思考和训练，最后达到重大决断的时候，仅仅凭借直觉就可以决胜负的程度。 这个直觉不是天生就具有的，而是日夜磨练的结果。就如同奥运会运动员那样，优美的跳水姿态背后是多少个日日夜夜的训练呀。
每個人終其一生，都會碰到三次大好機會，只要把握其中一個已可衣食無憂；如能把握其中兩個可成為小富；能三個亦把握到，便可大富大貴。可唔可以及時把握，就要睇平時努力與身心磨練矣。 -------------------------------- 译文：每一个人的一辈子，一般都有三次机遇存在，只要能够把握其中一个，就可以衣食无忧，如果能够把握住其中两个，就可以成为小富翁，能够三个都把握住，那就一定能够成为大富贵了。 但每当机遇来临的时候，你是否能够及时的把握住？那就要靠平时的努力和身心磨练。
累積財富三大層面；一、滙市；二、股市；三、房地產，背後都係日夜磨練。 --------------------------------------- 译文：财富的积累一般有三个地方，一、汇市；二、股市；三、房地产；无论哪个地方，成功的背后，都是日夜磨练的结果。
投資者日記 [曹仁超] 2008 09 06 可口可樂「以華制華」 9月5日，周五。恒生指數跌456.2，收19933.28；成交652億元。9月期指跌547點，收19693點，低水。恒指20000點失守，向去年8月17日低位19386點進軍。呢個水平係港股直通車計劃未傳出前水平，技術上睇有強大支持。過去唔少年份，5月份都係股市高潮，因此有Sell in May之說；9月份係一年股市嘅低潮，所以有Buy in September。9月通常都係入貨月。 今天新鴻基地產（016）跌6.1％，收95.1元，因高盛降其評級及將香港GDP增長率由5.2％降至4.2％、明年由5％降至4％；長江實業（001）亦跌5.7％，收105.1元；信置（083）跌5.5％，收12.28元；其他好似鞍鋼（347）跌7.4％，收8.56元；馬鋼（323）跌3.5％，收3.01元。因淡水河谷（世界最大鐵礦砂生產商）要求加價13％，以便同澳洲鐵礦砂售價睇齊。 金威啤酒（124）跌16％，收0.88元，因半年蝕咗2470萬元。 滬深三百指數跌3.01％，收2183.43；日經平均指數亦跌2.8％。MSCI亞太區股市指數跌2.1％。 今年MSCI亞太區股市指數跌26％，跌幅係標普五百一倍。去年10月至今全球股市冇咗15萬億美元市值。 代表一百一十四隻亞洲區原材料股指數本周跌12％，係1995年以嚟最大跌幅；唔知羅傑斯呢位商品市場大好友有咩感想？ 滙源果汁（1886）成為可口可樂併購對象，對業界嚟講有D意料之外。雖然滙源品牌喺中國果汁市場佔第一位，100％果汁佔中國純果汁市場46％，以及中濃度果汁佔市場39.8％，但以可口可樂國際品牌旗下「果粒橙」和「酷兒」兩大品牌，也佔果汁飲料25.3％，拋離統一（220）喺內地包裝果汁市場22.1％佔有率。呢兩年原材料和經營成本上漲對整個企業帶嚟好大壓力，呢刻可口可樂如發動攻勢贏取市場佔有率第一位根本冇難度。點解可口可樂唔發動攻勢？一嚟怕8月份出台《反壟斷法》，但更怕逼虎跳牆，令滙源與統一聯手對付可口可樂攻勢，咁就有排搞。 好多對沖基金就快玩完 入股66％滙源令佢絕唔會同統一聯手；反而同可口可樂「果粒橙」和「酷兒」兩大品牌合作，令統一心慌慌，甚至大大削弱統一喺內地市場佔有率。咁樣一嚟中國果汁市場便由可口可樂旗下三大品牌（滙源、「果粒橙」和「酷兒」）分享，其他品牌再無法入侵中國純果汁市場矣。由於可口可樂只佔滙源66％，令中國《反壟斷法》鞭長莫及，佢花百多億元便可壟斷中國果汁市場，你話抵唔抵先？ 最慘係其他經營者好似統一及康師傅（322）等，佢地未來喺中國果汁市場佔有率，將進一步下降，甚至被迫退出；可口可樂呢一招「以華制華」用得極之巧妙，不愧係國際巨無霸。 中國8月份CPI估計喺6％或以下，相信今年4月份CPI升幅8.5％已係高峰；估計8月份CPI升幅為5.6％，漸接近人行目標4.8％。 美國作家理查．奈喺《華爾街美林》一書內話，喺牛市中投資股票，既唔使艱苦工作，亦唔使用太多智慧，對別無所長群體嚟講，係幾吸引賺錢手段，而唔知道投資行業摧毀性原因，一如良家婦女淪為娼妓原因一樣。一旦熊市嚟臨，投資市場露出猙獰面目時，佢地就恨錯難返。 過去百幾年華爾街內炒手都係極其聰明人，喺牛市中呼風喚雨，卻喺熊市中一敗塗地。只有嚴守止蝕唔止賺人先會喺自己蝕咗15％至20％時退出，呢D仲算聰明，但自以為好叻人往往聰明反被聰明誤；不過，止蝕講就易、做就難，家吓有幾多人已止蝕?! 次按危機後20％華爾街員工已冇咗份工，但轉行並唔易，因為有邊一行好似金融業咁高薪厚職？過去年薪數百萬美元人點搵工？唔少人從此長期失業。 日本經濟自1990年起日落西山，政府多次推出刺激經濟方案仍未見效，令政府財赤成為OECD國家中最高。證明透過增加政府開支去刺激經濟反而扼殺咗公眾人士消費，最終搞到經濟半生不死。 八十年代日本政府抗拒日圓升值而濫發鈔票，造成股市同房地產泡沫至今仲無法完全復元。 美國經濟2000年科網股泡沫爆破，聯儲局聯同白宮利用減息、壓低美元滙率及退稅，令美國經濟2003年復甦，方法同八十年代日本政府同日本銀行有咩分別？去年次按危機後至今已一年，一樣冇妥善方法去處理。今年第二季GDP上升3.3％，擔心呢個只係回光反照，係政府寄出支票最後一次鼓勵消費，踏入8月份已疲態畢露。疲弱勞工市場已令零售業增長放緩，引發美股大幅回落。 歐洲雖然第二季GDP收縮0.2％，但央行堅持唔減息保持4.25厘，央行估計今年GDP升幅只有1％及明年1.2％。通脹率3.8％仍距離目標2％好遠。歐羅見1.4385美元係1月22日以嚟最低。 由於估計美國經濟停滯不前及歐洲進入衰退，美國未來GDP增長率得2％，而歐洲可能唔足1％，令歐羅今天跌至十一個月最低，同時令商品價格全面回落。 道指周四回落3％，見11188.23，美國銀行一天之內下跌7.2％，Caterpillar下跌5.6％。大藍籌股下跌速度幾可追及二線股。市值140億美元紐約對沖基金Atticus Capital被傳玩完，但呢間公司CEO否認。更多對沖基金玩完相信只係時間問題，依家只係捱得一時得一時。 油價由7月11日147.27美元回落到家吓105美元，跌幅達27％，其中超過6％喺本周回落。OPEC上月估計明年全球石油需求升幅只有1％，因為歐洲經濟放緩緊。1986年初油價每桶26美元，1986年3月已跌至每桶10.25美元；1997年10月油價每桶23美元，亞洲金融風暴後1998年10月油價每桶11美元。油價喺極短時間內跌50％係唔令人奇怪事；Thomson路透社估計年底油價見91美元，以及喺2010年前見82美元。今年7月份我地見到應係另一個泡沫。 標普GSCI指數（代表二十四種原材料）7月3日由893.86至今回落25％；代表商品熊市7月份出現，十分相信我地見到又係一個泡沫。 鋁價由2月至今回落44％；米價由4月至今回落24％；大豆由7月至今回落26％。 上述一切都喺度話畀大家知，商品價格如唔係見頂相信亦已進入中期性調整。 英國樓價可以有序回落 Mitsui OSK（日本最大運鐵礦砂船隊）跌至七個月新低（今天再跌5.7％）；Nippon Yusen KK（日本最大船隊）今天跌4.2％；Kawasaki Kisen Kaisha（日本第三大船隊）跌5.4％。波羅的海指數5月份至今跌幅接近一半。東京Okasan Securities認為投資者應避開航運股。 南韓政府喺度努力支持南韓圜滙價。周三及周四兩天中央銀行已用咗210億美元，佔總外滙儲備8％（7月份動用100億美元、8月份動用40億美元）。今年南韓圜回落20％，見1130兌1美元，美林證券估計今年GDP增長率只有4.3％及明年3.8％。今年外資已拋售300億美元南韓股票，下周大量債券到期，估計央行會加息去支持，因為手上外滙儲備漸跌至危險水平。南韓短期外債約1700億美元，點樣去應付外債到期？真係令人費煞思量。 美國8月份連續八個月失業率上升，家吓失業率已達5.7％。消費（佔美國GDP三分二）喺7月份扣除通脹後出現四年內最大跌幅。美國消費者開始減少消費。呢個訊號好壞。 日本企業第二季減少資本開支6.5％。Fitch計劃把今年日本GDP增長率降至1％。日本企業第二季純利下跌5.2％（製造業跌11.7％，非製造業跌0.2％）。 歐洲央行主席認為歐洲經濟活動減弱，相信到2010年才能穩定落嚟。歐洲央行收緊銀行條款以免銀行濫用借貸，引發歐洲同英國銀行股大跌。條款收緊後金融機構比較上難從銀行方面取得廉價資金（以證券作抵押成本上升）。英國HBO跌7％、柏克萊跌7％、萊斯銀行跌5.7％、UBS及其他地區性銀行股價亦出現較大幅度回落。 Fifth Third Asset Management接受彭博訪問時說：「資本主義齒輪已面臨停頓。」2005至07年上半年大量短期貸款令資本市場出現泛濫。隨住次按危機出現，資本市場出現退潮。各金融機構除咗為CDO等大幅撥備5000億美元呆壞賬外，摩通分析員Alex Roever認為未來十六個月，有最少7870億美元浮動利率債券到期並要求兌現，令明年銀根緊上加緊。 英國白高敦希望透過為首次置業者提供16億英鎊協助去頂住市值4萬億英鎊樓市唔跌，可以咩？英鎊過去一年已回落15％，最近一個月回落5％，樓價過去一年已回落11％。最近英國財政大臣戴理德更認為英國將進入六十年內最差經濟環境，相信佢言過其詞。戰後英國推行每周三個工作天制，結果到咗七十年代通脹率達25％，1980年代初期失業人口達三百萬人，成為歐洲經濟病夫。鐵娘子上台後加上北海油田投產，八十年代開始英國經濟享受咗二十多年繁榮期。 今天不但英國樓價超貴（去年最高峰時係1995年200％），英鎊滙價偏高，令後生英國夫婦根本買唔起樓，漸漸演變成政治問題，但唔係冇得救。例如畀樓價有秩序咁回落，以及畀英鎊滙價逐步回落，講到尾英國至今仲係歐盟中表現最好經濟體系，亦係東歐人、俄羅斯人及中東人最鍾意居住歐洲國家之一，情況較家吓日本樂觀。 內地房地產市場低迷，價格下行，斷供風波不絕於耳。國泰君安梁紅麗指出，家吓破產只係小型房地產，即使牽涉銀行融資，銀行收回土地資產價格亦唔會大幅縮水。加上銀行風險管理體系趨完善，對房產商發放貸款時已更嚴格，最多係呆壞賬增加，但唔會影響整體銀行業績，更加唔會影響內地金融安全性。近年商業銀行風險管理水平已大為提高。以招商銀行為例，房地產貸款只佔全部貸款比率5.81％；興業銀行房地產貸款只佔總貸款14.01％，可以講係好安全。資料顯示日本1992年地產貸款佔銀行總貸款35％；1996年印尼地產危機前，地產貸款佔總貸款20％；1998年新加坡地產貸款佔總貸款30％至40％。認為上述問題大家唔使操心。 上海市中心最大經濟適用房項目喺徐滙區華涇地區8月15日已開工，並計劃今年年底完工，吸引唔少低收入困難家庭關注。估不到我老曹亦有條件入住呢塊交通方便寶地。成個專案佔地十三萬七千九百方米，地積比率二點五倍，提供住宅三十一萬方米，其中60％係經濟適用房、40％為商品房、綠化率35％及可建三千四百套經濟適用房，其中四十五方米者佔18％、六十方米者佔77％及七十五方米者佔5％。據了解，楊浦江灣、松江泗涇、寶山顧村、南滙周浦及閔行浦江等交通比較方便，生活配套設備相對完善地區今年內動工。上海市首批一百六十萬方米經濟適用房將全面開工啦！ 最先起源喺十七世紀荷蘭。十八及十九世紀由英國發揚光大，到二十世紀由美國繼承體系係：一、航運方面能力；二、環球化發展；三、商業與專業力量相結合而稱霸全球。英國嗰時再加入良好公務員制度去維持商業上操守。維護個人利己主義，唔受利他主義所影響。同時有良好社會組織，畀人們發揮創新精神，對良好事物保留，畀人們可以擁抱理想。 改造利己主義 過去幾百年上述體系曾面對西班牙帝國興起，其後係法國拿破崙式帝皇主義，跟住係德國納粹思想、日本軍國主義、印度Mughal帝國及中國滿清皇朝。第二次世界大戰後自由、民主及開放體系又面對馬克思主義重大挑戰，人們一度質疑呢個制度；近年伊斯蘭教挑戰，甚至中國和平崛起，又令呢個制度面對考驗。 進入二十一世紀，呢股源自十七世紀荷蘭體系，由英國同美國發揚光大，係咪到咗窮途末路，最後被取代或改造？睇番人類歷史上有幾多文化及制度最後被取代。源自荷蘭市場經濟加自由民主制度，會唔會有一天被近年冒起中國同印度文化所改變，再無法保持科技上優勢，繼續成為全球最有創見經濟？例如第二次世界大戰時德國納粹精神（強調紀律及服從，令整個社會井井有條）及日本軍國主義（全國人民服從日本天皇而建立強大軍事帝國）？過去三十年中國一黨統治反令市場經濟獲得更良好發揮機會。伊斯蘭教派支持下新民主獨裁制度，似乎亦較目前西方自由民主制度更能適應現代社會。 近年日本及台灣，因全盤接受美式自由民主制度，令經濟停滯不前；反之中國一黨專政加市場經濟制度卻令經濟欣欣向榮。令人質疑英美維護個人利己主義制度是否有被改造必要？由伊斯蘭教國家或中國新民主獨裁制度所取代？又或者上述只係暫時性，最終仲係源自十七世紀荷蘭，依家英美實施自由民主市場經濟制度先最適合人類？但過分維護個人利己主義，正漸漸將人類社會推向兩極化。今天英美兩國經濟面臨走下坡，美國未來總統如係麥凱恩已年紀太大而且不獲中產階級支持，奧巴馬不但經驗唔夠，其政治主張更似半個馬克思，好似向富人抽稅可令美國經濟重返1982年之前六十及七十年代咁，明年英美實在幾令人擔心。